八方為咗做美食家同專家交流過，邊個見過朱古力獎門人？冇呀？八方見過，真係見過。佢就係朱古力品嚐家陳嘉恩 (Katie)。
朱古力應唔應該放入雪櫃？佢話朱古力保存溫度約14-20℃，應該係先用保鮮紙包住，放入餐盒，再放入雪櫃；食之前喺雪櫃攞出嚟攤抖20分鐘，就最原汁原味。品酒認可導師李凌霄 (Louis)就話威士忌味道複雜，無論係含海鹽嘅朱古力，或者香甜白朱古力，一樣夾到。
海港城即日起至2月21日設立Chocolate Trail Cafe，由專家設計朱古力Tasting Menu，為唔同朱古力配搭威士忌、咖啡、鐵觀音等，捐$30或$60畀香港血癌基金，就可嚐甜頭。同場仲會有「匠心獨運˙朱古力雕塑展」，展出朱古力大師Marijn Coertjens及霍耀文（圖）作品。
馬泉崇攝