利物浦周三喺英足盃第三圈重賽迎戰乙組仔埃克塞特，領隊高路普派出好多𡃁仔，包括21歲澳洲後衞巴特史密夫、20歲後衞干拿蘭度爾同埋22歲中場奇雲史超活等，不過最後都輕鬆贏3:0晉級；而養傷619日嘅法拿根都後備落場踢咗40分鐘左右，賽後連巴西名宿卡富都戥佢開心。
由於埃克塞特實力有限，加上有主場之利，所以高路普選擇出弱陣，正選名單上只得米洛列特、荷西安歷基、祖阿倫、佐敦伊比同埋賓迪基係大家見慣見熟。雖然係咁，佢哋憑祖阿倫、奧祖同埋祖奧卡路士各入一球而贏3:0，其中奧祖禁區內嗰個入波更加係靚爆。要留意，呢場波對「紅軍卡富」法拿根別具意義，事關係呢個23歲後衞長唞20個月後首場比賽，曾經點名稱讚佢嘅巴西名宿卡富，賽後都喺社交網站留言，話好開心見到對方傷癒復出。
另外，返咗洛杉磯銀河備戰新一季美職嘅前利物浦隊長謝拉特話，大家要有耐性，畀啲時間新任領隊高路普，等佢喺轉會市場買番幾個啱用嘅球員返嚟，再搞好個季前備戰，之後先會見到成效。高路普今季季初接手之後，23場比賽攞到11勝7和5負，表現中規中矩。