前財爺兼下屆特首黑馬梁錦松（圖），近排頻頻就教育議題發功。做過教統會主席嘅佢，前排撐完普教中俾人圍插後，噚日出席教育講座時又彈教育商品化，認為本港教育政策須改善，要教育個性化，又認為要讓學生通過活動進行體驗式學習。
阿松話，現時年輕人嘅追求已超越知識層面，大部份能力不能單純計分數，課堂上要營造快樂學習。阿松舉咗一份小學生嘅功課做例子，嗰份作業要求小朋友填充，題目係「老師說下星期要再測驗中文，這真是一個壞＿＿。」小朋友填「老師」，結果得到交叉，要填「消息」先啱。阿松就覺得，填「老師」冇乜唔啱，仲話現時部份教育政策有異化情況。