由趙世曾擔任主席嘅卓能集團（131），近年主力內地市場，香港可以賣嘅樓盤寥寥可數，舊年更加連總部灣仔卓能廣場都賣埋。由於新業主德祥地產（199）已經收樓，卓能亦要將總部喬遷至同區中環廣場，由業主變租客，總部面積亦由之前嘅大約1萬呎，𠵱家得番3,000呎。
卓能總部近排搬去中環廣場高層一個海景單位，近3,000呎，市值月租約18萬。佢哋舊年以7.9億元賣咗卓能廣場，本來用嚟做總部嘅最高5層，合共大約1萬呎；𠵱家新總部，足足少咗成6,000幾呎。
對於新總部規模咁細，卓能會唔會將根據地搬去內地？趙世曾大女趙式芝話，絕對唔會，因為香港始終係屋企，總部必然會喺香港。之前沽總部滿意利潤，未來都會物色新總部，未必繼續租人哋地方。