馬英九無法解決台灣經濟問題，加上國民黨老化，與大陸親近，不為台灣年輕人所喜，於是國民黨在大選大敗，馬英九愧對國民黨。
蔡英文上台，又有乜辦法？《蘋果日報》（一月十七日）報導，台灣GDP去年第三季負增長1.1%，創三年新低，青年人失業率超過13%，大學畢業生起薪點15年不變，靠父母過活，人口中位數突破40歲，長者人口超越小孩人口，即係話老化問題打到埋身，年輕人將來幾難交稅撫養老年人，而民進黨聲言加強社會福利，不知錢從何來？
台灣以前係四小龍，經濟起飛年代，全靠工業出口賺外匯，左丁山在1980年代幾乎每兩個星期到台灣一次，視察信貸客戶嘅工廠以及拜訪大財團及新興工業，為銀行拓展貸款市場，嗰陣時一啲名牌產品，如今失咗蹤，剩番嘅多數搬咗上大陸。80年代初香港工業北移，導致成本大大降低，在國際市場競爭力大增，現在想番轉頭，那是大時代的開始，台灣廠商懵然不覺，直至90年代，香港廠商憑着珠三角廉價廠房與勞工，輕工業產品橫掃全球，台灣工廠先至知道如果唔搬廠就死路一條，於是趁住機會走呀走，卒之走到不亦樂乎，而今台灣除咗高科技工業，已所餘無幾，但台灣金融業、會計法律專業一貫大落後，高科技養不活廣大基層低技術員工，農業產品唔夠大陸平，開拓尖端市場產品則本土市場太細，打世界波如HTC就唔夠砌，有能有識之士索性跑去北京上海發財，於是形成台灣經濟十幾年來發展慢如蝸牛嘅局面。
馬英九想話與大陸簽服貿協議，擴大市場，但觸動年輕人及反大陸人士（未必係如蔣介石時代之反共）示威抗議，冇得郁；蔡英文敢唔敢再推服務貿易協定呀？暫時未必敢，將來點呢？靠台南式本土經濟搞咖啡店、藝術館、民宿，唔歡迎大陸人，只歡迎外國人？（據報導台南最近宣佈英語為第二官方語言），台南模式據講吸引咗一啲香港年輕人移民台灣開咖啡店，但一個小城市可以如此，整個台灣豈能只靠塘水滾塘魚過活？中產階級搵唔到銀何來銀紙去飲雅緻高級咖啡？此乃浪漫主義，做總統豈可浪漫，蔡英文以後必然倚靠美國日本幫忙，申請加入TPP，如此一來，就要開放台灣市場讓美國農產品進入台灣，令豬肉牛肉大量輸入，蔡英文斷不能聽年青浪漫主義嗰一套，否決自由貿易嘅。馬英九做唔到，蔡英文要帶領台灣進入世界市場與各國簽訂自由貿易協議，將來恐怕要得罪支持者，在所不惜！