球證喺比賽求愛，已經唔啱，毫無職業操守；求愛不遂後仲玩針對，擺明係公報私仇，就更加賤格！星期日喺西班牙一場女子甲組聯賽，球證艾里干喺比賽中想媾維爾瓦體育會嘅帕維莉，但結果食檸檬，之後唔知係咪懷恨在心，趕咗維爾瓦體育會兩個球員出場，搞到維軍輸波。
狂派兩紅牌兼漏判12碼
喺呢場聖特利沙主場對維爾瓦體育會中，執法球證艾里干竟然喺工作期間口花花，撩維軍後衞帕維莉：「啡髮嗰位靚女，有冇興趣下晝一齊飲杯咖啡？」帕維莉真係睬佢都儍，仲叫佢：「你顧掂自己，吹好場波啦！」俾人當面拒絕，真係顏面何存！據英國《太陽報》話，艾里干呢個小器球證之後就玩針對，趕咗維爾瓦體育會兩個球員出場。雖然我求大俠冇睇過場波，判斷唔到嗰兩面紅牌係老屈定罪有應得，但《太陽報》實牙實齒咁話，艾里干肯定畀少咗個12碼維爾瓦體育會。最後，維爾瓦體育會以2:3輸波。
無啦啦俾艾里干喺比賽度撩，今年31歲、嚟自羅馬尼亞嘅帕維莉已經嬲嬲哋，之後佢再睇到艾里干執法不公，搞到球隊輸波，佢嘅怒火要爆發嘞！帕維莉賽後向電視台爆大鑊，狂插艾里干唔尊重女球員，「我唔再相信足球世界有公平，呢一刻我覺得好無助，簡直被羞辱！我踢咗咁多年波，從未有一刻受到咁大嘅侮辱！」我求大俠覺得艾里干喺比賽中媾女簡直係對足球嘅侮辱，作為球證，應該認真看待每場比賽；𠵱家佢食檸檬就針對維爾瓦體育會，假如帕維莉答應同佢去街，咁佢就偏幫維軍？公平公正蕩然無存。希望西班牙足總可以好好調查呢件事，懲處害群之馬。
我求大俠好奇問過車路士足球學校（香港）女子隊翼鋒曾麗珊，睇吓香港有冇發生過呢啲事，佢就話踢咗幾年波都未遇過口花花嘅球證。
