民建聯蔣麗芸噚日喺前黨主席譚Sir交帶下，突然變身立法會「強力部門」，頻頻喺會議廳門口同立法會走廊「捉人」，仲要全部「有入冇出」，希望確保議事廳內有足夠議員，但唔知係咪太「強力」，搞到佢竟然喺議事廳當眾拉筋舒展！
話說元秋捉人期間盡顯霸氣，一度吩咐身旁的立法會女保安「幫我睇住，唔好畀人出去！」，女保安聽到呆一呆，應該知道阻礙議員出入會議廳同「強力部門」跨境捉人一樣，都係犯法。或者佢真係「捉人」捉到攰，開會期間竟當眾「拉筋」。元秋事後解釋呢啲係坐飛機舒筋動作︰「即係有時我坐長途機呢，坐成10個鐘，應該每兩個鐘頭郁一郁，唔係嘅話，血管好可能唔運行，所以我每兩個鐘頭都郁一郁。」