恒指市賬率跌到唔夠一倍，係好平好平，咁平嘅理由，淨係人仔爆煲都可以無限想像吧。仲有，你睇全球大型銀行股，唔係淨係渣打（2888）、匯控（005）先識插，花旗、瑞銀、巴克萊都一樣係free fall格局，就知仲有我哋唔知嘅金融風暴正在發生，風眼喺邊？淨係知中東點都有份吧，紐約期油跌穿30美元都冇support，就當石油本身冇成本，只計開採成本都要12、13美元，玩到咁都唔願減產，背後又係有古怪，莫非唔促銷就冇命？答你唔到。
睇完一系列驚嚇嘢之後，可能大倒你，之後覺得一定會爆炸，我就建議唔使一味睇到咁淡，原因係即使金融問題幾大都好，總會有一班好有智慧嘅人諗緊點樣解決，有人有頭髮有辦法，絕處都可能逢生。
睇完一系列驚嚇嘢之後，亦可能你覺得估值低，冇有怕，買入股票擺喺度幾多幾多年，合埋眼唔睇就遲早贏成條街。呢個時候我就會說一聲，太長線嘅嘢話唔埋，即使呢浸快將中線見底，一定有技術反彈，但係好番幾個月，之後會唔會跌落無底深潭，重複1929至1933年金融系統滅亡邊緣？都唔係冇可能，你我未見過唔代表機會不存在。
所以，唔使太驚，又唔好唔驚，小小驚青同時又小小大膽，見步行步，就點都有路行。
晉佳
https://www.facebook.com/advanceguy1/