今年農曆正月喜日兩相逢，西方情人節、元宵節僅相隔一星期。近期大熱韓國首爾「Light Rose Garden 玫瑰燈海園」世界巡迴展覽首站已選址香港，2月14日起2.5萬朵LED白玫瑰，將落地金鐘。
Light Rose Garden花海2月14日（情人節）至22日（元宵節）每晚6時亮燈，因橫跨兩個甜蜜蜜日子，特別先喺2月14日起率先落地中西區海濱長廊，2月20日起再移師去隔籬添馬公園，等市民免費感受兩個節日唔同氣氛，合照放閃。
展覽請咗名人甜蜜放閃做宣傳，包括甚少一齊亮相嘅名作家倪匡與太太李果珍，兩人雙十年華時已一見鍾情，相識40日同居，4個月共諧連理，結婚56載，仍然甜蜜。講愛情當然唔少得尖東忌廉哥、忌廉嫂，兩公婆以行動表達愛，鏡頭前錫錫。
限量五千朵已賣晒
喺熱爆劇集《她很漂亮》及韓星金秀賢所拍嘅首爾宣傳片中，都可以見到呢片喺首爾東大門設計廣場嘅白玫瑰花海。今次來港規模更大，有2.5萬支防水白玫瑰燈，花海高低有致。
咁夢幻嘅愛情都未必係遙不可及，由本地社群、婦女人手嵌製嘅「Light Rose」玫瑰感應燈每朵100元，限量5,000朵，部份收益撥捐公平貿易聯盟。網站www.lightrosegarden.com噚日開放預訂，好快賣晒，策展單位AllRightsReserved話會加推喺現場售賣。
李八方
mailto:[email protected]