溫碧霞（Irene）除了傾情於「海潮」式的美之外，她最大心願是再拍一部蕩氣迴腸的愛情故事。溫碧霞年輕時經歷過《靚妹仔》的放縱、《停不了的愛》的激情、《地下情》的不羈。現年49歲的她趨於平淡，在新作《愛在深秋》換成細水長流的黃昏戀，永恒不變的除了亞視，還有她的招牌跌膊。
撰文：張俊銘
溫碧霞先後與周潤發、梁朝偉及劉德華合作於微時，拍過《靚妹仔》、《停不了的愛》及《地下情》三部電影，在電視上除了妲己外，最為人回味的角色，自然是永恒跌膊靚樣的海潮。反璞歸真成為人妻及人母之後，念念不忘的就是再拍一部愛情電影。
錯過可能搵唔番
早前她自組製作公司拍新片《愛在深秋》，達成多年夢想。對於經典電影如《甜蜜蜜》、《忘不了》是溫碧霞口中好看而近年又少之又少的片種，她指愛情電影是很多觀眾愛看的類型，現代人花太多時間在工作上，忽略了愛情，她說：「希望睇嘅人會感動，帶畀大家一個夢想，片中嘅愛情故事都幾似我自己，初時導演諗住搵我拍，個故事好似為我度身訂做咁，好適合我去演。」
《愛在深秋》講述作為演員的溫碧霞與丈夫譚耀文的感情變淡，溫碧霞說：「每一段感情都係咁，部電影話畀大家聽，段感情個愛都喺度，但大家都渴望追求激情，先至會有婚外情或離婚，到最後想畀訊息大家，一定要珍惜自己身邊一段感情，如果唔去珍惜，可能一生人只有一次機會去愛一個人，去愛一個人真係唔容易，而且係要雙方，放棄咗可能遇唔番。」戲中溫碧霞誤會老公有外遇，闖蕩到桂林，並愛上一個司機，發展姊弟戀。
譚耀文過往在港甚少拍愛情片，他表示當日收到劇本後感到新鮮，而且首次與溫碧霞合作，譚耀文說：「我好好奇點樣可以同女神談戀愛，戲中丈夫要承受乜嘢壓力，好多圈中人工作太忙，可能將感情放埋一邊。」譚耀文大讚溫碧霞在戲中臨場爆肚對白夠感動，令到他聽到亦打冷震，譚耀文說：「Irene有一場戲，臨時改晒所有對白，講出對愛情純真嘅對話，我都震咗一吓，好動人好深刻。」
譚耀文自認傳統
工作為先，愛情第二，是譚耀文認為適當的做法，他說：「我諗冇一個女人想同冇事業心嘅男人一齊，愛情係滋潤咗一段關係、昇華咗一段關係，係要有將來，好睇個男人點樣去掌握自己生命，好難話分幾多位，家庭、感情。好多時我哋冇得揀，工作已花咗好多時間，要休息又要鍛煉自己，可能自己又要收身又要健康，身邊人叫食飯又唔食，未必好盡情放鬆去做，責任感好重，一個男人點犧牲都唔緊要，最man係可以承擔晒所有困難，每個人都有困難，因為係一家之主，我喺呢方面係好傳統。」
阿譚愛情變感情
譚耀文和太太03年結婚後育有兩子女，對於如何培養夫妻感情？譚耀文說：「有啲夫妻根本唔識點去愛，到走嘅時候先至知，真係好悲哀。有啲人話check手機，其實結咗婚唔代表你就係擁有。」他認為愛情變了感情，並非問題，見到一家人開心已經足夠，他說：「屋企人好彩冇投訴，我返到屋企就畀番晒時間佢哋，我又唔會打機，做司機送返學。」
至於溫碧霞與何祖光結婚16年，溫碧霞坦言十分珍惜二人的感情：「一段感情要好好去保溫，好多朋友錯過咗一段感情，以為可以搵得番，其實係再搵唔到。」她更寄話失去愛情的人，未來應該更加勇敢去面對、勇敢去愛，有正能量才有好收穫。
溫碧霞
化妝：Katherine
髮型：Ken Ng of Alchemy
譚耀文
化妝：Alfred of A.P.O Team
髮型：Kuero_sun of Hair Culture hk
場地：My Seasons