CY喺施政報告對勞工界關注嘅問題隻字不提，搞到立法會內勞資雙方議員劍拔弩張，工聯會仲「明張目膽」支持民主黨單仲偕（圖）出任一個小組主席，明顯有心向CY示威！
立法會研究取消強積金對沖嘅小組噚日首度開會並選主席，泛民派出單仲偕落場挑戰自由黨張宇人。泛民喺小組內唔夠建制派人多，點知開票卻係12票對12票，肯肯定有建制派變節！結果同票嘅單雞獲幸運之神眷顧，喺代主席工黨李卓人抽籤下坐正。商界議員見到咁嘅情況，竟離場走人，冇參與副主席選舉，結果由工聯會鄧家彪出任。
工聯會陳婉嫻直認四票加埋勞聯潘兆平都投俾單雞，解釋今次係「勞工階層利益大於一切」，實在唔想商界人士做主席。民建聯葉國謙話，查實佢喺勞資之間做過中間人，建議研究標時同埋強積金兩個小組一人做一個主席，而標時小組由潘兆平揸莊，強積金應由商界做啦；嫻姐否認接受過葉嘅協議。