基斯坦奴朗拿度（C朗）喺今季西甲暫時入咗16球，係皇家馬德里陣中首席射手，亦喺西甲射手榜緊隨蘇亞雷斯之後。不過佢今季除咗俾人笑只係識對弱隊入波刷數據，亦被批評射罰球技術都退步埋，今季聯賽仲未靠射罰球入過波。日前球隊訓練嗰陣，連教練施丹都嚟挑C朗機同佢鬥射罰球，結果現年43歲嘅昔日球王施丹完勝，塞錢入C朗袋。
C朗今季入得一個罰球
據西班牙《馬卡報》引述當地網站《Sportyou》報道，話施丹見C朗喺度練緊射罰球嘅時候一時技癢，走埋去半講笑咁同C朗講：「行埋一邊睇吓點先係射罰球啦。」喂，話晒我都係當代球王，使你呢個過氣法國球王嚟教我射罰球？C朗即刻話要同施丹鬥吓射罰球。結果左右腳射門都咁掂嘅施丹射10球入晒，而C朗只係入得兩球。雖然C朗大比數慘敗，但兩大巨星都旨在切磋吓，現場氣氛相當唔錯，輸咗嘅C朗笑住咁孭起施丹走咗幾步，和氣收場。
事實上，C朗今季喺射罰球嘅表現真係麻麻地，喺西甲20場入16球，冇一球係嚟自罰球（見附表）。佢喺今季唯一一次主射自由球建功，係喺上月歐聯分組賽煞科戰主場8:0狂數馬模場波，C朗個人攻入四球裏面，第一球就係靠罰球搞掂。
傳肥賓叫練罰球反面
施丹係咪有意指出C朗罰球技術有需要改善，定係純粹只係搞吓氣氛，相信要佢本人先知，如果係前者嘅話，手法上至少比前任主帥賓尼迪斯高明。賓尼迪斯喺今個月被炒之前，同C朗已經決裂就人所共知，據講佢哋其中一個矛盾，正正係同C朗入罰球數字減少有關。有次肥賓召C朗去佢辦公室，話佢近一兩季罰球入球率大跌，又話自己同一間生物力學公司有聯繫，要C朗去嗰度測試吓射波步伐同方式，得出數據再去改變點射波。C朗聽完就面都黑埋，回應都冇就轉身走人。
另外，皇馬被國際足協判罰今夏同2017年一月兩次轉會窗都唔可以註冊新兵，之前傳話係死對頭巴塞隆拿舉報，日前又傳話「真‧二五仔」其實係拜仁慕尼黑。