市道下滑，生存之道，在乎比人精，比人更有要求、到位。市道好景，冇人得閒同你拘泥於小節，例如，有冇諗過，𠵱家連商場個廁所沖嚿廁紙點解要沖兩次先沖得去都要俾人投訴。又或者買完嘢，冇人幫你挽袋送出門口兼連聲道謝，都會覺得招呼不周。
所謂做得專業，不論行業、不論身份、也不論賺錢多寡，都在乎「精」、更在乎「達」。今時今日，仲有一些專門賣CD、DVD的小店，你會奇怪，乜𠵱家睇戲煲劇，唔係上網睇嘅咩？
唔講你可能真係唔知，那些經營者，佢哋好似做政府電檢，你想搵咩戲，search by國家、戲名、男女主角、片種、心情、再加埋顧客口味、喜好、甚或癖好，佢哋都瞭如指掌。就好似擁有一個龐大的人肉資料庫，隨時要啲乜，就可以click一click，即刻load晒出嚟。
又或前幾天果籽有篇報道，講述經歷父子兩代前後半個世紀的補鞋匠，單睇其幾十種嘅補鞋工具及機關，已經叫人嘖嘖稱奇。亦有做地道美食猶如雞蛋仔，做到大排長龍，低調高手。
做燒鵝做到米芝蓮，有一樂燒鵝、甘牌燒鵝，取得一星之後，有麻煩友質疑其服務差勁、意圖唱衰，老闆娘氣定神閒、不卑不亢咁解釋道，我哋係食物一星，冇講過係服務一星……
賣衫褲鞋襪嘅致勝之道，尤其係零售業咁差嘅環境，就更講求mix & match的本領，個客要試牛仔褲，你就單憑短短觀察佢嗰十秒，估計佢嘅品味及style，畀埋件上衫、皮鞋佢去襯返條褲，希望佢會買褲之餘，順手執多兩件，當人流明顯少咗，增加ticket size就係另一條出路。
清潔伯伯溫馨提示
有一次，有個朋友去光顧一個商場嘅廁所，正當準備小便一刻，背後突然傳來清潔伯伯一陣溫馨提示，「唔好意思，唔該可唔可以行埋一步？」（事情發生在男廁尿兜前）。你可能會覺得佢好冇禮貌，然而，切勿忘記，保持廁所衞生，正是佢工作的一個首要要求。
文廸晞
mailto:[email protected]