首先寫此文前，小弟要重申我係中國人，我非常熱愛祖國，因為我唔想突然之間坐洗頭艇宿娼嫖妓，或者突然自首十幾年前未有駕駛執照時已經喺國內某地方車死人。
做中國人其實好沉重，青天白日滿地紅旗唔扯得，仲要隨時有鞠躬道歉準備；做中國足球員可能仲沉重，國家隊教練佩連月初被炒，中國足協請新主帥嘅目標，係爭取2022年世界盃決賽周入場券。六年後嘅事好難講，但𠵱家呢班國足成員，好似鄭智、黃博文、馮瀟霆等等已經有番咁上下年紀，已經要換代，但新嗰班國奧隊呢？
U23國奧隊，理論上係中國足球新希望，不過𠵱家踢緊嘅U23亞洲盃，三戰全輸分組賽出局已經唔在講，亦都秉承大國腳嘅傳統，名大於實、虎頭蛇尾、團結性差，除咗廖力生入過靚罰球，其他都一無是處。其實本欄都有呼籲過，中國年青球員應該學日本南韓咁，趁早走出去，歐洲又好，南美洲又好，總好過喺中超搵食。國奧隊有個踢荷甲維迪斯嘅19歲前鋒張玉寧（中）甚具天份，睇吓佢會唔會咬實牙關繼續喺歐洲度捱，定係頂唔住中超人民幣力量，回國搵食。
瀏覽國內足球網頁，新一季中超繼續有無限金錢，巴甲MVP連拿度奧古士圖又落戶北京，廣州恒大話買幾個深圳青年球員，又話唔知用咗幾多千萬，但有錢唔係代表成功，一帶一路唔係話有錢就起到，仲話咩中國足球夢，唔通施政報告講多幾十次，中國就打入世界盃咩。
文：牽牛