港滙由7.75的強方兌換保證水平，跌到現時弱方底線7.85在望，歷時才不過10日。有人話，港股近日沽空比率頗高，同時港滙1年遠期沽盤亦相當活躍，把兩者連結一起，隱約有97、98年大鱷狙擊港元、玩雙邊操控（即透過拋售遠期港元，從而推高利率，同時沽空港股及期指圖利）的影子。年初大家倉位唔算多，甫踏入2016年兩個星期，大市即已跌到咁，係咪事有蹊蹺？
跌市如果只因為淡友起風作浪，那倒容易辦。但一如分析師朋友所言，近日這些沽空動作，大多只為「搭順風車」搵啖食而來；真正大跌市的主因，仍是大家預視到即將公佈的企業盈利，將會醜樣到你唔信。加上市場對中國沒有邏輯的政策取向已失去信心，經濟改革成敗存疑；而油價急跌在全球引發的連鎖效應，亦導致有部份大型基金出現嚴重贖回。所以，今次係「真．走資」，是「實錢」在撤離。「大家都搵唔到任何理由要買貨，跌市唔係因為有好多人在沽的問題，而係根本就無support」。
港股昨日一跌，相信只是香港步入漫長調整周期的序章，資金走勢一旦逆轉，情況猶如港滙轉弱一樣，速度可以快到你唔信。容許海迪引用漫畫《一拳超人》當中的術語來形容目前環球金融市場面臨的「災難級別」，已達「龍級」水平，即有「多個城市（股市）面臨被摧毀的危險」。
綜合市場看法，港股遠未見底，切勿向高難度挑戰。
海迪