結婚嘅時候，新郎唔一定着禮服嚟行禮，英國有個叫贊堅斯嘅阿仙奴球迷，日前就着住愛隊嘅波衫、波褲、波襪、護腕、護脛同波砵，嚟同佢老婆法蘭結婚。贊堅斯咁話：「我太太真係冇得頂，佢畀我着全套阿仙奴波衫嚟同佢結婚，我真係覺得自己好幸運。」雖然佢太太法蘭冇着阿仙奴波衫波褲嚟進行婚禮，不過都好配合贊堅斯而揀咗阿仙奴嘅主色紅色，着咗件紅色低胸長裙；而佢班姊妹亦一樣，都係着紅色裙㖭。