Netflix本月登陸香港，身邊鍾意睇美劇嘅朋友都即刻入會，令到Netflix呢個品牌貼身好多。公司近日公佈季績省鏡亦全靠海外市場食糊，以全球196個國家計，佢嘅服務覆蓋範圍超過130個國家，佔市場六成幾，不過就冇中國份。
行政總裁海斯汀（Reed Hastings）話唔心急入中國，做嘢要睇長線，同中方磋商花時間，所以「慢慢來會比較快」。佢又以蘋果iPhone為例，指iPhone要好多年先成功爭取進入中國，但當時機一到，就可以獲得龐大商機。
所以海斯汀話，大家想釣大魚嘅話，必須要有耐性、建立長遠關係、聆聽同肯學習。有個識睇長線嘅老闆領軍，Netflix做埋倍升股，過去一年股價升咗120%。