中國奧運隊喺U23亞洲盃出局，連敍利亞都唔夠打，睇嚟習近平想見證國足踢世盃決賽周嘅足球夢都凍過水嘞。計番個年齡，呢班國奧應該係國足進軍2022年世盃嘅主力，但除咗廖力生嘅罰球令人留下印象之外，其他都難以接班。
國家主席習近平（前）鍾意足球，係人都知；上有好者，下必甚焉，自從佢做咗國家副主席後，大搞足球外交，中國球壇就開始蓬勃起來，最具代表性嘅係恒大喺2010年入主廣州隊。恒大仲喺習近平接任國家主席嗰年、即係2013年，拎咗個亞冠盃返嚟。呢兩年中超越嚟越有錢，睇嚟都係因為上有好者，所以班有錢佬就爭相扔錢發展足球。截至禮拜二，今個冬季轉會窗轉會費最高嘅15單轉會入面，竟然有六單係來自中國球會，唔單止中超群雄，連踢中甲嘅天津權健都有份，真係有錢到暈。
按慣例，中共領導人係做10年，所以習近平應該會喺2023年退落嚟。由於國足出線2018年世盃嘅機會都名存實亡，如果佢想喺任內睇到中國踢世盃，就只有寄望2022年。當外圍賽2019年開始踢，到時就要靠張稀哲、武磊呢代撐起，但睇嚟都唔太掂。再往細一輩睇，就要靠呢支國奧隊，真係一山還有一山低。其實，小弟最擔心唔係習近平無法圓夢，而係當佢七年後淡出，人走茶涼，中國足球成為棄兒。如果下任領導人原來鍾意籃球，啲有錢佬唔搞足球，全部走晒去搞籃球的話，到時中國足球真係唔知變成點！
文：咖喱