港島南同新界區嘅戲迷有福嘞！管理MCL院線嘅洲立影藝宣佈，海怡半島廣場同粉嶺逸𥧌廣場都會開新戲院，每間院有3個廳，分別喺3月同第3季開幕，裝修緊嘅又一城戲院則預計第2季完工。
洲立影藝有限公司總經理黃寶珠話，去年香港有19億票房，升咗兩成，希望今年都有雙位數升幅，公司目標係「區區有戲院」。
嚟緊仲會加新元素，好似可以喺戲院睇明星演唱會直播、歌劇等，仲會入多啲曲奇、酥餅等小食，令大家唔使淨係食爆谷、熱狗咁寡。
噚日發佈會大老細林建岳（圖）都有撐場，八方問佢點睇施政報告叫發展商起戲院，岳少就話，最好梗係地契入面加番條款起戲院，多幾間戲院都有可能令戲飛減價，佢話仲記得特首兩年前已講過要加，希望唔好講完唔算數囉。