曼聯領隊雲高爾（圖）喺今季不時被傳會俾人炒魷，紅魔最近戰績好番啲，呢位64歲荷蘭老帥暫時成功自救，但佢似乎已經厭倦咗成日要喺呢啲壓力下執教，雖然雲高爾同曼聯嘅合約到16/17球季完結先屆滿，但等人炒不如我自己炒你，據講雲帥打算喺今季結束後就自行離開。曼聯上場贏咗利物浦之後，英國《BBC》進行咗個網民調查，雲高爾仍然係被認為下位離任嘅英超主帥第一名，佔成26.2%，比第二位嘅維拉領隊加迪多超過10個巴仙，難怪佢咁冇癮。