在台灣的中華民國總統及立法院選舉，一如所料，民進黨大勝，國民黨保不住總統職位，已是預知的事，更加連立法院控制權都輸埋，民進黨歷史上第一次掌握全面行政立法，以後四年可以施政隨心所欲了，唔似得陳水扁做總統時，國民黨仲係控制議會，令陳水扁有啲顧忌。
國民黨得票率不及四成，直情係慘敗，喺其他地方，好少見到一個執政黨當權八年之後，可以輸得咁慘嘅，2012年馬英九得票五成八，大勝蔡英文，做乜在四年後蔡英文乜都未做過，毫無政績可言，就可以輕輕鬆鬆得票五成六，而國民黨總統候選人朱立倫只得到三成一選票？追究責任，當然係馬英九無能無謀之過，呢位靚仔總統，曾經得到好多人嘅歡心，以為佢形象清純，斯文靚仔，清廉自持，中英文俱佳，受精英教育，又跟隨過蔣經國，做事唔會差啩？誰知就係銀樣鑞槍頭，正一膿包，在任八年，毫無建樹，台灣經濟停滯不前，政治改革無寸進，國民黨仍是派系分立，老人家賴死不走，馬英九想話立威，趕走王金平，點知毫無權術計謀可言，俾老奸巨猾嘅王金平玩番轉頭，於是威信盡失，在國民黨內號令不行。
朱立倫之流只係市長之才，身為國民黨主席竟然拒絕應戰，推一個洪秀柱出嚟做炮灰，後來發覺好唔妥，又踢走洪秀柱，自己披甲上陣，做男人做到咁無用，枉費佢又係博士（紐約大學），佢讀會計財務，做掌櫃好過啦，搞乜鬼政治噃。馬英九朱立倫以至王金平等都係國民黨罪人，今年輸得慘，以後除非英文係另一個陳水扁（大概唔會啩），否則民進黨得年輕台灣人支持，國民黨都幾難翻身，馬英九愧對老父，愧對蔣經國，之後在台灣好生寂寞。蔡英文又點呢？首先要執爛攤子唔容易，何況又孭上台獨包袱，國際上一定受北京強力打壓，政治上幾難有突破，所有政治（有民選國家）皆為民生經濟服務，當今台灣之經濟低迷，青年人失業率超過13%，大學生第一份工嘅薪水，長期低於一萬港元，叻仔叻女都去外國或大陸發展，台灣工業已出走得七七八八，馬英九想與大陸加強經貿聯繫，台灣青年人極力反對；蔡英文唔要大陸，就要TPP啦，台灣農民又極力反對。蔡英文對經濟管理識唔識，有待考驗，佢一入總統府，就係痛苦的開始。