周二意盃八強賽事，意甲榜首拿玻里喺主場迎戰國際米蘭，將兩大主力希古恩同咸錫都收喺後備席嘅情況下，以0:2落敗出局。國米教練文仙尼（左二）贏咗場波，但完場前慘被對手主帥沙利辱罵，嬲到爆。
文仙尼賽後講番臨完場嘅情況：「沙利應該被逐出球壇，我只係向第四裁判投訴點解補時五分鐘咁多，佢就彈出嚟鬧我係『X基佬』，成60歲人都做埋啲咁嘅嘢，你話佢係人唔係？簡直羞恥。之後我喺更衣室見到沙利，佢亦向咗我道歉，不過我希望佢認真反省吓，如果喺英國搞埋啲咁嘅嘢，唔使旨意再喺球壇有得撈。」
上星期先過57歲生日嘅沙利，賽後態度就相當輕佻：「球場上成日都會發生呢啲嘢，一完場大家握握手咪冇事囉，文仙尼都鬧我係老嘢，唔通佢又係歧視老人咩，下次我會鬧佢係天主教民主黨員嘞。」