化妝品股卓悅（653）大股東葉俊亨夫婦上個月忽然向一名投資者減持咗大約16%股份，套現3億元，根據聯交所資料，只知呢位投資者叫做陳健文，公司噚日終於出通告，話委任陳健文做執董，一係唔講，一講先知呢位仁兄有好多銜頭㗎。
呢位53歲叫陳健文嘅投資者，銜頭包括太平紳士、特區選委會成員、內蒙古自治區政協委員會港區召集人、中國國家行學院（香港）工商專業同學會創會副會長等等。
而佢另一個身份就係商人，卓悅話佢喺內地有多項直接投資，包括商用房地產同多項製造業務，望落似係喺政商界都好吃得開。難怪市場之前揣測，葉老闆唔係打算賣殼，而係希望引入陳健文作為第二大股東，靠對方嘅人脈關係，打通內地市場喇。
不過，陳健文以每股0.555元入股，卓悅噚日收報0.37元，賬面唔見三成，唔知會否低位溝貨呢？反正葉老闆仲持有45%。