買股票最重要係upside多、downside少，同時上升或然率要高。噚日跌幅係前日反彈幅度嘅double，呢類假突破後急跌走勢，真係唔講得笑，小弟上一期建議博反彈，但噚日中午喺facebook page都轉軚交代自己沽貨避一避險，原因就係大跌嘅或然率突然增加，寧願略有損手，都唔冒大跌風險，最正路等下一個港股free fall情況下先撈貨，而free fall可以係今日、聽日，只要撈底訊號一出，小弟會盡快交代。
上期講到國家主席習近平出巡反映人仔危機已紓緩，始料不及嘅係呢個因素只令A股回穩。港股面對港滙突然轉弱，大家開始驚聯滙再被衝擊。大行花旗講到，目前衝擊聯滙嘅危機不及以往大，不過佢只講到硬幣的一面。另一面係，今時今日特首梁振英只根據中央利益行事，總之唔搞到中央就冇問題，話知香港爆煲，情況有如向淡友中門大開，呢啲就係政治影響股市了。用打籃球作比喻，你由一個防守高手變成唔願防守嘅球員，即使面對當年手下敗將，但你退步得快過對方，勝算自然比當年仲要低了。
最後講番兩句鞍鋼（347），噚日曾經跌超過8%，點知下午跌勢收窄，收市跌3.5%，已比其他中資股叻仔得多，亦連續跑贏大市，形成中線逆市上升趨勢，一定要尊重，遲早要買返。關於鞍鋼嘅分析，擇日再交代。
晉佳
https://www.facebook.com/advanceguy1/