立法會噚日開大會繼續二讀辯論俗稱「網絡23條」嘅《版權修訂條例草案》，而點人數嘅鐘聲響咗成25次，最終竟然「爆冷」冇流會，有建制派私下笑稱好意外，但講到明，相信未必可保持唔流會紀錄。
其實喺第一次流會後，建制派對於呢場拉布戰策略已經有變，至少唔夾硬編更，點解？皆因唔少建制中人話，開會唔只係建制派嘅責任，泛民唔使開㗎？要孭就一齊孭，所以佢哋只係盡量留守在席，流唔流會聽天由命，總之要向外宣揚，泛民有份製造流會，唔可以由建制派獨攬罪名。
予人覺得「訴求」來自各界
而午飯時間係流會高𥧌期，花生友發現已經好少建制議員外出午膳，大多數都只係留喺大樓內醫肚，而喺中午時段嘅響鐘期間，更出現建制派齊齊喺鐘聲一響後離場嘅「奇景」，唔係拉隊走人博流會，而係15分鐘內走入宴會廳扒個飯或食個包，總之夠鐘前返去點人頭！
建制派外，版權業界據聞都有新策略。有別於以前以大聯盟形式，一字排開搞記者會晒冷嘅模式，據聞以後會更多分頭出擊，各自以界別名義開記者會或登廣告等呼籲通過條例，覺得咁樣先話到畀大家聽，𠵱家係有好多個界別有相同訴求，覺得一齊現身未必能突出相關界別嘅意見，而拆開之後，又可以當做有多個意見，實在一舉兩得，好似電影業早前就出聲明力促通過條例保障原創咯。
花生友
周二、四刊出