嘢可以亂食，但護照真係唔可以亂玩。效力巴塞隆拿嘅阿根廷球王美斯喺舊年12月去杜拜領獎，有個阿聯酋差佬喺入境櫃台見到美斯本護照，訛稱問准美斯個保鑣後，就攞美斯本護照嚟同自己拍片。本來就冇乜嘢，點知呢個差佬就死蠢兼衰多口，掟條片上網之餘，仲講笑話究竟應該燒咗美斯本護照定係放返原處好，結果咁就瀨嘢，俾阿聯酋政府告佢侵犯他人私隱，日前仲要上庭。雖則呢個差佬堅持問准咗先拍片，但咁做始終唔啱，預計喺本月尾宣判時九成會罪成。