台灣藝人羅志祥（小豬）本月14日參與《極限挑戰》電影首映時，一句「不用分那麼細，因為我們都是中國人！」回應觀眾問他跟幾位中國明星合作感受後，小豬的官方fb，短短一日就跌咗成18,000個like。
昨朝一早，輪到已經離開咗香港市場好耐嘅謝霆鋒，陷入「一家人」嘅關公危機。
事件起因，係fb一個名為「謝霆鋒 Nicholas Tse」、擁有292,656人like嘅page，昨早上載咗兩張霆鋒訪問截圖，圖中以殘體字寫出兩句受訪說話「第一不該分中國、香港，本來就是一家人。」又嚟？
此語一出，不足五小時經已有近九百人留言，當然，大部份都係抨擊，留言「粗」中有細，仲好離奇咁引來大批用殘體字嘅網民翻牆挑罵戰，有大陸網民直頭話:「咁你咪欄出香港咯，你響中國嘅土地上吠乜野？」、「哎喲，我算見識了什麼叫港獨狗台獨狗，都滾吧，別用中文，你大陸爸爸不要你了。別再中國地界叫喚。」好明顯腦子有毛病。
其實此訪問係出自霆鋒2012年接受央視節目《新聞調查》訪問，該集名為《香港電影：北上北上之謝霆鋒》；而呢個fb page，並非霆鋒官方page，而係由fans操盤嘅，仲係殘體字嘅添。依家問題唔係個page真定假，而係點解霆鋒要咁講？
睇番條片，訪問係喺霆鋒位於香港嘅「PO朝霆」進行，片中介紹霆鋒嗰陣，都係標明「香港演員」。訪問由合拍片講起。霆鋒感慨年代潮流在變，令港產動作片青黃不接，故越來越多香港電影人北上拍戲。
主持人問霆鋒:「香港和內地在合作的過程中，等於是給香港的電影、給香港的演員提供了更豐富的可能性。」霆鋒就答:「更豐富的可能性，也是一個重生的機會，坦白說。我真的覺得，第一不該分中國、香港，本來就是一家人。我相信很多在香港拍的電影，有了內地的演員，會好看很多；有一些內地拍的電影，有了一些香港的人，也會好看很多。」
霆鋒於訪問中，緊接住係話，喺香港仍然有一班電影人，為「香港電影」這個品牌而努力，而佢本人，亦用自己血肉之軀，為港產動作片努力：棄用CG，用真人上陣。「我覺得這是一個誠意，也是一個香港動作片，香港精神(Spirit of Hong Kong Action)。如果講這句話，都沒有把一個榜樣做出來，你沒有資格說香港電影這四個字。」
還原番個訪問，內容就係咁。當然，事隔3年，今日的霆鋒點樣睇，或者是否仍有空間俾佢講「香港電影」，實在難料。至於此page like數——唔係跌，而係由今午292,656，升至293,131。