工聯會過去3年都喺農曆新年前夕舉辦長者團年飯，等一班獨居長者可以喺大節日，有個暖笠笠嘅夜晚。若然只得工聯會中人出席，未免太單調，所以佢哋會邀請名人做特別嘉賓，向在席長者送上意外驚喜。
繼前晚由特首梁振英打頭陣，噚日立法會主席曾鈺成則接力，據知曾鈺成非常受歡迎，唔少長者拉住佢合照，𠱁到長者笑騎騎（圖）。其實曾鈺成過去都曾任同類活動嘉賓，但今年卻有特別之處，佢自己喺致辭時都話，相信係最後一次以立法會主席身份出席，明顯去意已決。
今日嘅嘉賓則係前財爺梁錦松，近期佢頻頻現身談教育，唔知認唔認同教育局局長吳克儉話，外訪辛苦過留港？