距離特首選舉仲有一年多，睇吓特首梁振英喺施政報狂loop「一帶一路」冧阿爺，爭連任用意都好明顯！唔少建制派私下都認㗎，阿爺若然要撐CY，佢哋點可以說不？但就算要投CY，都希望投得順氣啲，若然未來班子繼續有掛住外遊而唔開會嘅吳得掂，咁就弊傢伙喎！呢一點，係人都明嘅，反而近期聽到有建制陣營，對政制及內地事務局局長譚志源唔多like，八方卻有啲出奇。
觀乎𠵱家問責局長中，相信唔少人覺得政務官出身嘅譚志源都幾四正！但據聞建制陣營最近因為優化選民登記問題，嬲咗譚志源，至少兩個分別嚟自唔同黨派嘅建制中人話喎，譚志源偏幫泛民；有人又話若下屆梁班子有譚志源，佢要諗諗喎。嘩，玩到咁大呀？
到底譚志源做「錯」乜？查實政府只係建議優化選民登記制度，包括要求選民提交地址證明，據知建制政團非常反對，係人都知啦，佢哋嘅支持者都係上咗年紀，如果同仔女住，未必有住址證明，加上選舉事務處早前嚴打，去信抽查，據知唔少老人家根本睇完都唔明；就算明，都唔覆，怕麻煩吖嘛。
講明唔撐交地址登記
有建制中人稱，上一輪被剔除選民資格嘅廿萬人中，大部份係建制支持者，又「訴苦」話有人因此去建制派嘅地區辦事處投訴，責怪佢哋辦事不力，搞到冇得投票！據知建制政團已經同當局單聲，唔會支持交地址做登記，仲質疑譚志源疑似同支持建議嘅民主派扯貓尾。
八方諗唔明，叫得抽查，建制泛民支持者被抽中機會理應相等，何解被剔除嘅偏偏係建制票呢？明明優化選民登記打擊種票係好事吖，點解會成為罪名咁陰功豬㗎？但八方相信以譚志源嘅手腕，絕對可以四両撥千斤，化干戈為玉帛。
李八方
mailto:[email protected]