港股今年風高浪急，好多股票不斷試低位，個別股票嘅股價越來越低，相對往年股息，股息率（yield）就顯得越來越高，好似好吸引咁，一向sell股息率高嘅內銀股就係一例，新近有上市公司就畀呢個high yield吸引，走去買建設銀行（939）股票。
創業板公司新煮意（8179）噚日宣佈，舊年底至本周一，分開3次買入302萬股建行，涉及資金1,519萬元，睇番建行𠵱家股息率接近8厘，睇落都真係幾吸引。新煮意3次買入價分別為5.55元、5.19元同4.67元，越買越平。如果公司未來可維持派息，都真係幾好嘅投資嚟㗎。
呢間新煮意前稱喜尚，即係經營季季紅酒樓，賣「有米豬」嗰間，舊年底公司話計劃買起被《米芝蓮》點名推介嘅「十八座狗仔粉」，股價隨即急插，成為市場熱話。