上個星期開始，港股已經連番出現應大跌、不大跌嘅情況，當中有兩日係美股道指跌成400點，但翌日港股都跌唔多，反彈似乎等理由同超賣訊號出現。
超賣訊號一早出咗了，恒指9小時RSI五底背馳，都唔夠，仲要插多轉令RSI再跌到20，夠殘了吧。點解殘到咁？港滙不停破底，內地喪走資，仲要實施有限度滙管，搞到大家驚爆煲，人仔「真．爆煲」的話，恒指一萬點都嫌高，難怪大家呢一刻莫講話唔敢買，話要short都越講越興奮。
踏入今個星期，有單嘢一定要留意，就係國家主席習近平出巡中東。試諗吓，風頭火勢習大大仲有心情出去遊山玩水，就證明處理危機已經唔係目前首要任務，曲線話你聽人仔單嘢暫時見底，就當暫時啦，都夠個市反彈到九里遠。
如果大家覺得人仔雨過天晴，樂觀版本係由危機價彈番去衰退價，重上市賬率1.2倍都唔難，恒指就可以上22000點，即收復今年失地，人仔單嘢當冇事發生。悲觀版本就假設短線跌市未完，當反彈幅度係今年跌幅嘅黃金比率0.618倍，都可以上番20875點，現價買坐穩等食糊，隨時都要用幾張紙巾先夠抹嘴，望係咁望吧。噚日中資股越殘越愛，中車（1766）、海螺（914）啱晒狗衝。至於真正轉勢，真係要留意鞍鋼（347），咦！又呃夠字數，要下期先講了。
晉佳
https://www.facebook.com/advanceguy1/