【本報訊】17警察如此上進，動力何來？據取得資料，涉事5警長及12警員，本身沒有本地大學的學士學位、副學士或高級文憑，中學公開考試成績亦不理想，不符合考督察資格。有警隊中人指，不少同袍為「整靚」履歷博升級，部份人更為此走捷徑。
警隊中人指，若員佐級人員有學位，薪級點會較高，「如果想升做督察，更需要有學位先得」。據警方資料，2014至15年度經公開招募入職的見習督察全擁大學或以上學歷；新入職警員則約兩成擁大學或以上學歷。整體而言，警隊2.9萬名紀律人員中，約14%擁學士或以上學歷。警隊中人稱：「冇見過一個督察係冇學士學位，老實講副學士諗都唔使諗，因為督察真係要處理好多文書工作，冇咁上下學歷都應付唔到。」
管方設認證課程名單
部份警員為升職，更報讀不知名的海外學府，有知情者稱：「呢啲學校唔需要上堂考試，只需交論文，最離譜係學生可以抄論文，基本上有個範本，只需要喺上面簽個名就得，嗰啲大學好似冇去check吓篇論文係咪抄襲，有唔少夥計為走捷徑而報讀呢啲學校。」
消息稱，警隊管方為杜絕流弊，曾於前年發通告列出獲本港教育局學歷認證的課程供警員查核，若警員修讀的課程不在名單內，需自費進行學歷認證，否則相關學歷不能記錄在個人人事資訊檔案內，「即係攞咗學位都唔承認」。據悉，與國力合作的比立勤國立大學和太歷國立大學，均屬此類。
警隊曾點名指University of Management and Technology質素有問題，有警員自費進行學歷認證，結果其學位資格只相等於本港高級程度會考（A-level）程度。據悉，自警隊公佈上述通告後，再沒警員報讀這類受質疑的大學。