貴租唔止打殘小店，連公營機構都頂唔住？總辦事處設喺九龍站ICC嘅強積金管理局，將連同中環、葵芳嘅辦事處，下月22日起一併搬入葵興九龍貿易中心（KCC）1座，佔地3層總面積7萬呎，比之前三辦事處面積總和少一萬呎，但一年慳5,000萬。
積金局機構事務總監兼執行董事鄭恩賜同傳媒茶敍時話，合併後可更有效率，當然加租係主因，但拒透露加幅。參考番ICC呎租，高層約70元；而去年同樣進駐KCC 1座25樓嘅金管局，呎租約30元，租金平一半。加上過去一年股市唔多掂，影響積金局收入，所以今次搬遷都會用番舊家具。
積金局成立15年，由最初中環ifc搬去對面海ICC、再搬入新界，次次都幫襯新鴻基。鄭恩賜話積金局去到邊都帶旺嗰區，又形容KCC係「沙漠中嘅綠洲」。