一月七日下午同傅會長傾咗近三小時，講完生肖太歲、人物，吉日凶日之外，當然要講埋方位吉凶先至可以收工，為方便計，就由東南西北順序講落去。
傅會長叫左丁山睇蔡伯勵通勝匯載之方位圖，大標題係「丙申年大利東西不利南方」。淨係睇圖，左丁山都識少少，不過就要會長註釋先至睇得明白。
東方：震位，有九紫，主喜慶事如結婚，添丁等，如家宅門口向東，啱晒。
東南方：巽位，有一白，主有聲名，出名有望，但有劫煞，主鬧交不和，可在此位放置黑樽、裝八成滿水，以解劫煞。
南方：離位，有六白，主有權力，曆法以中國為中央，南方泛指澳洲紐西蘭一帶，有生煞，災煞，恐有天災之事。
西南：坤位，坤即女性，婦女當權，有八白，主錢財，女士有權之方位大可搵銀，會長話香港福位就係扯旗山，正正位於西南方，政務司司長林鄭月娥就係話得事女性，合晒合尺，香港有銀搵。但此方位有歲煞、陰府、太歲，正是不要在太歲頭上動土，香港可保福地，如要家中西南方裝修，要在該位放置黑水瓶養3枝或8枝富貴竹（綠色）。左丁山包拗頸，講吓業餘行外話，言及大嶼山在香港西南方、高鐵站在九龍西南方，於猴年一定會大興土木，郁動太歲，可知呢啲大型工程唔會幾順利且多延誤也。
西方：兌位，有四祿，主夫婦感情唔妥，多吵鬧，但利於搵銀賺錢，大概一個人荷包重咗，就會心思思，容易有小三，導致夫婦不和咯，要在此方位擺放黑色水樽放八成滿水。
西北：乾位，有三碧，主是非麻煩多籮籮，甚至打官司，在此方位放置紅色瓷器馬解救。
北方：坎位，有七赤，又係吵架鬥嘴多煩氣，放一隻黃色瓦牛在此方位。東北，艮位，有五黃，主疾病，身體唔妥，要用水樽在此方位養3枝或8枝綠色富貴竹擋煞。
中央：有二黑，主病符，中國就是中央，可能爆發流行病，家中在中央位置要放置綠色直身水樽養3枝或8枝富貴竹。家宅要看門口，向南門口放黑色或灰色地氈，放黑色水樽裝八成水。綜觀各方位，最壞在南，有三煞，及東北有五黃，而東方有吉慶，西方有大利。