南華噚日喺廣州同中超勁旅山東魯能踢咗場友誼賽，結果「少林寺」喺陳偉豪、保贊同陳肇麒等主力冇隨隊下，以0:1不敵對手。賽後足主張廣勇正式確認，菲力斯保耶、艾華、保贊同埋賴恩格菲斯將會以外援身份出戰亞協盃。對於南華派唔派兵踢賀歲盃，張廣勇話由球員自己決定喎。
球員自行決定踢賀歲盃與否
南華對魯能一開波就俾對方牽住嚟打，不過一班少林兵守得好好，令控制大局嘅魯能冇乜威脅埋門，半場互無紀錄。
下半場一開波，魯能就靠後備入替嘅巴西國腳迪亞高泰迪利頭槌打破缺口。雖然南華之後繼續受壓，但冇再失波，面對攻力強勁嘅魯能以0:1僅負。中場卡路士比賽期間手背被踩，送院檢查後證實冇乜事，可以隨隊返港。值得一提係，有球迷特登帶賴恩格菲斯嘅簽名國安波衫，由北京去到廣州捧場，認真die hard！
賽後南華足主張廣勇話，球員表現好好，唔喺full team之下有咁嘅表現絕對收貨。今場波國內有網台直播，負責人話高峯期有12萬人睇，家陣成個山東都識南華。張廣勇覺得今次北上好值得，因為提高咗南華知名度，嚟緊仲有機會同廣州恒大友賽，到時成效更大。
另外，因為有部份南華球員喺農曆新年申請咗放假，所以對派唔派兵參戰賀歲盃，張廣勇話踢唔踢一切睇球員意願。