一宗爭產案令全城知道，喺立法會爆粗而成名嘅民建聯大律師馬恩國，老竇係名畫家馬家寶，徒弟包括前律政司司長梁愛詩等名人。
不過馬恩國冇乜遺傳到父親畫畫基因，反而係書蟲一名。佢同八方講，年少時每逢周末或日，一家人成日郊遊，老竇主要去寫生，但佢反而會喺媽媽身邊睇書。佢話自己對文史書籍最感興趣，名著《西遊記》、《水滸傳》及《三國演義》都係心水，獨《紅樓夢》看不下去，「一啲英雄氣概都冇，情情塔塔『太粉紅』」。
買《龍虎門》被撕爛
原來佢曾經買過一本《龍虎門》返屋企，結果卻被雙親狠狠撕爛；除咗讀書，佢話細個都鍾意集郵（佢強調真係收集郵票嗰隻！），會透過郵票認識唔同國家。咪睇馬恩國𠵱家咁大大隻，睇番佢5、6歲時嘅舊照都唔算係肥仔。當時嘅佢影相一大特點或者係：好鍾意縮起眼耳口鼻扮鬼臉。原來細細個嘅佢已經整古做怪咯！