你我都做過別人的「𡃁」，難免都曾經心中暗罵老闆得把聲，講就天下無敵，做就有心無力之類之類，前車可鑑，當你有朝一日做人上司時，就要時刻謹記以身作則，致力做個受人尊重的小頭目。
周末在網上看到美國科技公關Nicole Rodrigues一篇文章，叫在這行工作超過十五年的行家縱使做了人家上司，也勿忘初衷，要永遠謹記，在公關這行業，勤力加努力，永恒是正道；為人上司的在專業以外，更要有效維繫團隊，方算稱職。
當頭棒喝，一於在此分享。
公關小頭目要團隊心悅誠服，必須以身作則。指派下屬人pitch古仔，一句就講完，但你自己係咪真係識做先？Pitch邊個媒體、邊個版位、call邊個記者、點鋪陳隻古仔記者先覺得有興趣有料到，唔覺得幫緊你做宣傳？一一都是技巧，唔使次次親身示範，但有時趁指導junior同事，晒吓你都唔係流嘅，亦必要也。
實戰以外，小頭目更要顯示自己比下屬多一點點策略性思維，識得關顧埋big picture，尤其當全隊人搏晒小命在前線幫你砌時，你更要守在後方較高位置，看清全盤形勢，一方面隨時跳出去補位，一方面瞻前顧後，準備好每刻作策略性重新部署。你有這能耐，下屬自會視你為學習對象。
一句話，苟日新，日日新，又日新，高級又如何，如果對新事物、新趨勢一無所知，反應遲鈍，除了千年老方法，甚麼新知識都教不到團隊，叫人如何尊重你？久不久請個業界高手畀個talk 團隊是個不錯選擇，團隊學，自己也學。
最後，要承認團隊中必有人在某些方面比你更醒更精，尤其網絡新知、科技應用，人家比你叻，一定要畀credit人哋，仲要虛心請教，知人善任。其實都唔係好難啫，係咪？
彭瑪莉
mailto:[email protected]