前利物浦領隊羅渣士前排上電視節目，大爆執教紅軍嘅往事，佢話自己冇轉會嘅話事權，同埋冇諗過要簽巴洛迪利。羅渣士話，佢希望簽個中鋒返嚟，有人問佢巴神啱唔啱心水，佢話唔啱用，但利物浦嘅轉會小組買唔到其他合適前鋒，最後高層就幫佢簽咗巴神，「轉會係集體（轉會小組）決定，我冇最後話事權，真係幾難過。」另外，今季被紅軍外借返AC嘅巴神，早前透過twitter幫利物浦打氣，叫利物浦隊友做前隊友，有網民懷疑巴神會唔會唔記得自己仲係紅軍球員。