當唔少港人仲沉醉台灣總統大選，市民可以一人一票、以689萬票將民進黨蔡英文送上總統寶座，以及太陽花學運後冒起嘅「時代力量」成為第三勢力、喺立委選舉報捷，為港人打下強心針，憧憬年底新一屆立法會選舉都要「變天」之際，內地官媒突然喺前晚播出桂民海「被自首」片段，霎時又搶佔香港嘅輿論焦點。中央咁嘅播片安排有冇目的？花生友相信，似乎係有，除非係冇。
溝淡台灣大選氣氛
有政界中人同花生友吹水時話呀，與其討論桂民海條自首片係自願定被迫，不如研究下，中央點解要喺呢個時候播出呢條一定會搶佔香港輿論嘅短片更實際：「根本唔需要睇條片有乜破綻，係人都知道桂民海同其他人士係『被失蹤』，再到𠵱家『被自首』，根本係一個劇本，只係唔知中央安排嘅大龍鳳幾時上演。」
結果北京喺台灣總統大選結束後翌日，播出桂民海「被自首」短片，有政界中人相信，意在溝淡大家對台灣大選嘅關注，始終呢次係反共情緒嘅一次勝利，而周子瑜道歉事件更挑起包括香港在內唔少人反感，而且第三勢力仲向香港新生代如黃之鋒等送上鼓勵喎，呢位政界中人話呀，中央肯肯定想將呢股港人嘅高漲情緒冷靜吓，而手頭上有乜話題轉移視線？非李波等人失蹤案莫屬，結果喺周日晚「爆料」，明顯別有用心。
花生友
周二、四刊出