一班議員噚日重返位於中環昃臣道嘅舊立法會大樓，絕對唔係失魂行錯路，而係因應大樓還原為終審法院，立法會司法及法律事務委員會委員特別重遊舊地，睇睇大樓內櫳新面貌，順道同首席法官馬道立等交流，邊食飯邊傾偈，傾咗約3粒鐘。
到底有乜雞啄唔斷？委員會主席廖長江話主要講咗平日關注嘅議題，如司法機構人手同工作地方不足等；法律界代表郭榮鏗就希望提高司法人員薪酬、待遇，吸引更多人入行等。至於李波失蹤係咪有人跨境執法、以及高鐵一地兩檢等熱門話題，據知未有觸及。
八方聽聞席間有建制派議員問及，近年係咪有濫用司法覆核嘅情況，馬官則以法律年度開啟禮演辭內容反駁，話司法覆核申請要獲法院許可先可提出，門檻已經好高嘞。