農曆年就快嚟到嘞，又係各黨派書法高手落區巡迴演出嘅時候。其中向來被認定寫得一手好字嘅公民黨余若薇Audrey，急不及待落咗幾次區向街坊贈送墨寶咯，其中一站係觀塘區麗晶選區。
該黨畢東尼今屆一擊即中踢走建制派潘進源；新仔辛苦打勝仗上場，Audrey當然要捧場，而且仲好有心思兼創意，例如用東尼嘅姓氏「畢」字寫揮春贈興，包括「畢生如意」同「畢竟成功」等（小圖）；而當日街坊排晒長龍索Audrey墨寶，反應好熱烈喎。
八方問過公民黨，今年會續喺維園年宵開檔，Audrey當然繼續坐鎮會粉絲，同時大派墨寶同街坊賀年。至於黨內嘅區選小鮮肉，手字又係點？噢噢噢，暫時冇人知，似乎要等Audrey鑑定後先有分曉！