祖雲達斯喺今季季初衰到貼地，聯賽排名一度跌到16位，估唔到一係唔反底，一反就贏到收唔到手；喺周日意甲佢哋又贏一場，作客烏甸尼斯大勝4:0，聯賽10連勝。由上年11月開始連勝嘅祖記，喺保羅戴巴拿梅開二度下，上半場已經入咗四球，下半場行行企企保持勝局到完場。祖記𠵱家連攞30分，目前以42分繼續排喺次席，落後榜首拿玻里兩分。至於祖記下場波嘅對手羅馬，換咗由史巴列堤回歸執教後依然冇起色，周日喺主場俾榜末嘅維羅納逼和1:1。