「中國首富」大連萬達董事長王健林都係亞洲金融論壇嘅演講嘉賓，佢講咗半粒鐘，唔係講佢嘅電影夢或體育夢，而係借機宣傳旗下萬達金融最新大計。
王健林話，佢哋下月喺北京推出一張好似八達通加信用卡嘅智能卡，張卡仲有會員優惠，可以儲飛行里數、搭巴士同買嘢都有折，佢希望今年推廣到有過千間商場參與，目標4年後發行5億張卡。
有人擔心呢張卡一卡通行後，壟斷咗個市場，王健林就好有霸氣咁話：「作為市場嘅我哋壟斷，總好過中央政府壟斷！」
王首富咁架勢，唔怪得佢近年東征西討做併購喇，買完香港戲院，又買美國電影製作商、三項鐵人賽事主辦公司等等。王健林原來想將中國無嘅嘢都拎返內地，仲話之後會繼續買買買，直到2020年集團三成收入來自跨國企業咁話。