銅鑼灣書店股東李波嘅「家書」久唔久就出現，但有幾多人信佢唔係「被失蹤」？似乎唔使八方畀答案。而長毛梁國雄同「快必」譚得志噚日到東區法院，就去年5月涉嫌搗亂一場學界辯論比賽應訊時，長毛似乎唔係好擔心，反而心繫李波，喺庭上同裁判官講，希望警察放咗佢哋，花多啲時間搵李波。
單案關於長毛同快必趁林鄭去灣仔出席星島全港校際辯論比賽時，舉黃傘同用大聲公嗌口號示威，涉嫌違反《文娛中心規例》，佢兩個都唔認罪。雖然控罪只係話佢兩個故意妨礙其他人使用設施，但一旦罪成最高可判監一個月，控方仲有17個證人、3小時片段指證佢哋，咪話唔大陣仗。至於林鄭使唔使出庭畀口供？下月22日預審先有眉目。