上季NBA總冠軍勇士，周一作客騎士合演總決賽翻版戰，勇士上年贏場數4:2，喺對手嘅快速貸款中心球場捧盃；事隔半年，勇士後衞史堤芬居里（Stephen Curry）仲話感受到呢份美好回憶。
居里懷念更衣室香檳氣味
勇士今季衞冕之旅開頭係威係勢，開季連勝24場，包括聖誕大戰主場擊敗騎士；不過，佢哋近期受傷患同輪換影響，近三仗輸兩場，累積37勝四負。居里賽前話：「我哋確實打出一啲唔好嘅比賽，不過唔會困擾我哋好耐，我會盡快扭轉。今次重返騎士更衣室，確實係好嘅回憶，我希望仲有香檳嘅味道。」
居里今季試過因小腿傷缺陣，呢場就要小心騎士後衞迪拉維度華（Matthew Dellavedova）嘞，事關美國一份報章同聯盟24位教練、球員做咗問卷調查，睇吓佢哋覺得現時邊位球員最嗱渣，結果迪拉維度華以13票高票當選，力壓排第二嘅雷霆前鋒伊巴卡（Serge Ibaka）。佢嘅最經典事件就係上季東岸決賽出嗱渣招，整傷鷹隊射手高華（Kyle Korver），一位冇開名嘅西岸教練就話：「認真比賽係冇問題，但迪拉維度華係存心去傷害，呢個態度真係唔要得。」