有「小護法」之稱嘅清華大學法律學院院長王振民已經履新中聯辦法律部部長，上周仲出席公開活動。查實小護法上月中已喺報章撰文，指「香港越來越不像香港」，似乎引起立法會主席曾鈺成不滿，噚日喺報章專欄開炮反問：「為甚麼回歸不到20年便走了樣？」仲話王振民叫人繼承英國傳統嘅講法，滲透「戀殖意識」喎！呢場筆戰火藥味好濃喎！
反問邊個應該妥協
王振民早前以〈甚麼是香港的深層次問題〉為題撰文，將港人深層次問題總結為「資本主義與福利社會的關係」、「命運共同體中香港與內地的關係」同「政治保守與政治激進的關係」，形容「香港越來越不像香港」，香港「偏激」嘅政治習慣係時候「冷靜」及「放下身段」，「妥協讓步，既是為別人，為香港，為祖國，也是為自己」。若然要講香港回歸後好似變咗質，相信唔少港人認定，中央越趨插手干政係成因，否則點會令港人反感？曾鈺成對小護法分析明顯不認同，噚日喺《am730》專欄以〈孰令致之〉為題反駁。
曾鈺成話，同意王振民指「香港變得越來越不像香港」講法嘅人，自然要問：「香港在英國人管治下建立起來的法治文明理性和諧的社會，為甚麼回歸不到20年便走了樣？」佢指王振民呢番批判鬥爭之說，或者會惹好多人共鳴，問題重點卻係：「放下身段」同「妥協讓步」等呼籲，「應該針對誰人而發，各人自有不同的看法」。唔少港人相信同八方一樣，睇到香港嘅特首最擅長搞批判鬥爭囉！
對於王振民質問：「為甚麼（香港）不繼承英國主流的保守主義政治哲學，不認真學習繼承英國的政治文化傳統」，曾鈺成對此極不客氣，佢話好難估到呢啲滲透「戀殖意識」嘅說話，係出自中國法律學者、「一國兩制」研究專家把口噃！句句被寸爆嘅小護法，幾時開筆還拖呀？
李八方
mailto:[email protected]