萬人迷碧咸噚晚旋風式嚟香港5粒鐘食晚飯，傾完慈善嘅事就會坐私人飛機離開香港。佢今次嚟其實係為咗下月27日至3月10日喺倫敦舉行嘅「David Beckham：The Man」展覽做準備，展覽最後一日嘅倫敦時間晚上7點仲會進行慈善拍賣，善款主要用嚟幫有需要兒童。屆時碧咸會將過去20年由著名攝影師幫佢影嘅相攞嚟拍賣，香港咁多富豪，碧咸當然希望佢哋可以踴躍支持呢個善舉啦！
所以佢老友鄧永鏘就幫佢約啲富豪同佢見下面，碧咸噚晚坐私人飛機約7點到港，佢着住西裝型佬look，喺私人停機坪落機。當時機管局知道有傳媒守候，吩咐機場職員要求記者離開。碧咸行出嚟兩次，然後又走返轉頭，之後碧咸由保鑣護送上車，佢臨上車時已急不及待除西裝褸，座駕之後直駛中環。
撩大劉仔女玩
大約7點半碧咸架平治房車已經去到中環中國建設銀行大廈，鄧永鏘同埋啲朋友喺門口迎接。後來劉嘉玲、林建岳、曾蔭權夫婦都有嚟，大劉劉鑾雄同甘比就帶住一對仔女出席，席間碧咸見到大劉對仔女咁可愛，都不斷同佢哋玩。
碧咸食完飯就搭車去咗置地樓上嘅英國拍賣行PHILLIPS傾拍賣啲嘢，傾完會搭飛機返倫敦，結束5小時訪港之旅。
撰文：馮仁昭
【私房菜】人均消費三千
碧咸噚晚去嘅餐廳「好酒好蔡」係近期名流嘅至愛私房菜，餐廳位於中環中國建設銀行5樓。「好酒好蔡」係嚟自廣州嘅美食同酒類品評家蔡昊所創立，理念係以食材為先，招牌菜包括脆皮婆參、清湯大響螺同酸辣麵。據知由杜琪峯同劉嘉玲嘅介紹下，林建岳非常賞識主理人蔡昊，於是就決定重金禮聘對方來港，餐廳仲係由鄧永鏘負責設計，單單裝修費已過千萬！
餐廳12月初正式開業，一班名流輪住試，包括大劉劉鑾雄、玩具大王蔡志明同名媛薛芷倫都試過菜，個個都讚不絕口，就連食得招積嘅蘇施黃都喺雜誌連續讚咗三期。餐廳消費一啲都唔平，未計酒水，每人基本三千，包房每晚消費萬六。
