立法會政制事務委員會噚日討論消除歧視性小眾諮詢小組提交嘅報告，點知有人唔覺意爆響口，話任期即將屆滿嘅平機會主席周一嶽，原來已參與平機會主席公開招聘嘅遴選，爭取連任。
是咁的，經民聯梁美芬會上發炮批評周一嶽係歷屆最受爭議嘅平機會主席，經常「企埋一邊」，點知曾任平機會委員嘅謝偉俊Paul，反指梁喺平機會遴選主席期間發表咁嘅言論唔恰當，口快快咁話因為周一嶽都有參與遴選。梁美芬即時話，冇聽過有關消息，即刻追問在席嘅政制及內地事務局局長譚志源，係咪有件咁嘅事？譚志源馬上封口話遴選進行中，內容要保密。阿Paul自知講多咗，即場道歉，仲望住梁美芬話，唔想出現陳文敏事件嘅翻版喎。