過年想去旅行，點講都好難將小朋友放低然後兩小口子自己遠走高飛風流快活，但帶埋小朋友去旅行又麻煩，特別是在飛機上，喊起上嚟都唔知點處理，自己燥底時，又騷擾其他人，非常尷尬。綜合了幾個處理小朋友的妙法，或者幫到你：
嬰孩：BB的需要最簡單，不外乎是食、瞓、屙，但喊起上嚟又往往最難捉摸，建議首先要預備充足食物，奶粉、果汁或流質食物之類。而航班下降時，因為氣壓轉變令BB耳朵不適，是最常出現爆喊的時間，可以試試在航班下降時餵哺，利用吸啜和吞嚥的動作幫助BB平衡耳壓。
一歲以上：玩具、零食都是必須，平時常伴的公仔或玩具帶上一兩件，另備一兩件秘密玩具在扭計時才拿出來；零食可帶備一些餅乾、果汁之類，可以安撫小朋友情緒。出發前不要讓小朋友睡太多，待他在機上多睡。降落時可藉喝水或吃糖幫助平衡耳壓。
如小朋友已達兩歲以上，不妨預告或模擬乘搭飛機將會發生的情況，讓他們早有心理預備，並告知在機上並無其他選擇，令其明白扭計都無用。
以上方法只可以幫到手，小朋友還是有扭計爆喊的可能，當方法盡出小朋友依然無動於衷，最後可以做的唔係發脾氣，而是平心靜氣，試試帶他到機尾最後排或洗手間，在影響到其他人最小的地方讓他冷靜下來，心平氣和安撫、抱一抱他，或多或少會有用。
最後，祝你好運。
記者：曾冠輝