雷神即係雷神，嗰頭於第三場贏完大熱蔡廐「育成寶寶」，呢頭第四場四班1600米，佢日前打電話向呂健威成功索騎的「運財之星」，又做大熱，結果佢用番幾乎一式一樣的跑法，將新座騎「運財之星」留住喺中前位置，拉士從外叠一衝過晒，贏近兩身位毫無敵手，人馬首次合作即以輕鬆姿態掄元，單Win派27.5元，組合獨贏再開A1並派16元正。賽後「運財之星」馬主楊華勇，與貌似韓星金泰希的太太莊菲娜一齊拉頭馬，十分恩愛。
無巧不成話，雷神這天復出頭四場都騎大熱門，結果交出兩輸兩贏，並以「育成寶寶」及「運財之星」呢對10號馬包辦第三口孖寶，個人於雙莫大戰中暫以兩W對三P領先莫雅。
「運財之星」今季一路由湯智傑操刀，包括季內首仗靠放贏五班1400米開齋，今場換雷神順利重響勝鼓，亦帶挈埋呂健威保持新一年日賽例贏未斷纜。此駒季內累積五戰兩冠一亞一殿一第五，水準極之穩定，今場畀佢擊敗跑第二的新勝馬「精算博奕」亦繼續有貨交，蔡廐三歲馬「精算博奕」上次由雷神開齋，今勻換羅理雅卻畀雷神破壞連捷大計，亦證明雷神冇揀錯馬，連帶蔡約翰唔可以連同第三場贏「育成寶寶」起個靚孖，名副其實成也雷神、敗也雷神！
今場三、四名順序為兩匹冷馬「幸運名駒」及「齊齊健康」，呢條四重彩派二萬九千幾。